A les seis de la mañana,
voi camín de la estación,
voi cavilgando mil coses,
mientres espierta Xixón,
si nun me llega pal taxi,
l´Alsa va ser la mio opción,
sigue orbayando nes cais,
queda plomizu Xixón,

va reburdiando una vieya,
pola contaminación,
por el Castillo de Salas,
o la plantona d´El Pisón,
“del Barriu de Montiana (diz)
a la Playa l´Arbeyal,
toles ventanes tan prietes,
tan negres como´l carbón”,

hai unes moces charrando,
pel llau del conductor,
van cuntando la so hestoria,
Aeropuertu de Ranón,
“ya lo dicía to padre,
ya lo dicía to ma,
más que facer tantu máster,
vas tener que te operar”,

YERA UNA LLEENDA URBANA (SÍ)
QUE NAIDE QUIXO ESCUCHAR (NON, NON)
SACA´L CARNE DEL PARTÍU (SÍ),
Y NUN VAS TENER QUE MARCHAR

Pue que dalgunu d´ustedes,
al sentir esti cantar,
pida la cuenta y marche,
por mieu a la F S A,
namás-y digo una cosa,
a quien se quede a escuchar,
yo soy un home sinceru,
nací a la vera la mar,

naide se sienta ofendíu,
porque esto ye lo qu´hai,
“la coyuntura es compleja”,
proclama la patronal,
pero´l gobiernu decreta,
paraísu natural,
y yá se güel nes cais,
otra güelga xeneral,

yo voi camín de Bruseles,
voi a xubir a l´avión,
tengo un nudu nel gargüelu,
llevo rotu´l corazón,
como lu tuvo´l mio padre,
como lu tien la mio ma,
dexo muyer y dos guahes,
maldita regulación,

tamién dicía´l mio güelu,
enantes de lo del pulmón,
ties de medrar daqué más (rapaz),
saca una oposición,
pero les cuentes fallaron y
yo ensín recomedación,
n´ERE tras ERE y procesos,
de vil privatización,

voi me con cierta ilusión,
tengo un contratu robláu,
marcho con grandes idées
nun soi de munchu follón,
y si la cosa torciera,
siempre podré retornar,
qué guapa ye dende´l cielu,
la torre la Llaboral.

YERA UNA LLEENDA URBANA (SÍ)
QUE NAIDE QUIXO ESCUCHAR (NON, NON)
SACA´L CARNE DEL PARTÍU,
Y NUN VAS TENER QUE MARCHAR

Esto ye Asturies, diz Barbón,
vamos agora a normalizar,
veo´l Niemeyer y la LD3,
con tantu ocalitu que nun dexa ver
dende Villabona más que´l Muselón,
y paso volando sobre El Solarón,
énte la estampa de la sindical,
pienso nel túnel del metrotrén,

l´AVE llegando a La Intermodal,
pero nun quiero polemizar,
habrá qu´avezáse pa progresar,
que ya los carbones son d´importación,
y lleven el sellu mediu ambiental,
y anque hai aguarones na´Escalerona,
anuncien les news de Radio Kras,
qu´entreguen un premiu a la Ventolín.